– Drøymer om ein båt som går heile året

– Me må ha ein idédugnad med både kommunane, fylkeskommunen og reiselivsnæringa for å sjå om me kan sikra eit rutetilbod både sommarstid, og på sikt også resten av året.

Det seier leiar i Hardangerrådet IKS, Ann Irene Eliassen Myrheim.

Ho drøymer nemleg om ei heilårig båtrute i indre Hardanger, tilpassa pendlarar og andre som like gjerne kan reisa med båt som med bil når dei skal mellom to tettstader langs fjorden.

Men det kan bli ein lang veg fram til ei slik løysing, og per i dag handlar det fyrst og fremst om å redda båtruta i sommarsesongen.

Nedprioritert

Den einaste båtruta med dagleg avgang frå Norheimsund til Eidfjord har vore nedleggingstruga fleire gonger og står som kjent i fare for å forsvinna når kontrakten mellom fylket og dagens operatør, Norled, går ut etter sommarsesongen neste år. Båtruta har totalt sju stopp fordelt på fire kommunar.

Frå fylket si side handlar det om prioritering av ressursar, forklarar pressekontakt i Skyss, Øyvind Strømmen:

– Generelt er det ynskt frå politisk hald at fylkeskommunen ikkje brukar ressursar på reine turistruter, men at dei kan stå på eigne bein og bli drifta kommersielt, forklarar pressekontakt i Skyss, Øyvind Strømmen.

Fram til no har finansieringa av båtruta vore eit spleiselag mellom Vestland fylkeskommune, Sparebankstiftinga Hardanger og dei fire kommunane Ullensvang, Eidfjord, Ulvik og Kvam.

Då båtruta mangla midlar til å halda fram i 2025, gjekk kommunane, via Hardangerrådet IKS, inn med ekstra midlar og berga med det eit tilbod denne sommarsesongen.

Vil ha fleire på fjorden

Sjølv om båten mellom Norheimsund og Eidfjord blir karakterisert som eit offentleg rutetilbod på heimesidene til Norled, er det flest turistar som nyttar seg av tilbodet.

Reiselivsnæringa i Hardanger ynskjer meir båttrafikk i åra framover, ikkje mindre.

Å få fleire til å reisa sjøvegen kan mellom anna vera positivt for å få til ein berekraftig vekst i reiselivet og avlasta vegnettet på strekningar med mykje turisttrafikk.

I arbeidet med å laga ein regional reiselivsstrategi for Hardanger, har det kome inn fleire innspel som går på å utnytta fjordvegen betre.

– Denne båtruta burde jo vore utvikla som eit fyrsteklasses tilbod der transportdelen og opplevingsdelen i reiselivet møtest. Det skulle vore eit føregangseksempel på korleis ein kunne knyta saman kollektivtransport og verdsleiande produkt i reiselivet, uttalte Margit Lund-Mikkelson under Rosendalsveko tidlegare denne månaden.

Ungdom og beredskap

Ann Irene Myrheim i Hardangerrådet meiner òg at det ligg eit stort potensial i å utvikla eit båttilbod vidare dersom ein tenkjer litt nytt.

Aller helst ynskjer ho seg ein båt som ikkje sluttar å gå når sommarsesongen er over.

– Fjorden er ein enkel måte å knyta bygdene og attraksjonane våre saman, og er det noko me treng så er det nettopp enkle måtar å koma oss til og frå kvarandre. Tenk berre på alle ungdomane som ikkje kjem seg rundt utan å bli køyrt av vaksne, seier ho.

Ho peikar også på dei mange rasutsette vegstrekningane i regionen, og behovet for å ha ein beredskapsbåt lett tilgjengeleg.

Det finst òg mange pendlarar og skuleungdom som med eit tilpassa rutetilbod kunne ha reist meir med båt.

Von om løysing

Sjølv om ho aller helst kunne ønskt at fylkespolitikarane endra meining, trur ho det finst fleire private aktørar som kunne vore interesserte i å drifta ei slik heilårsrute.

– Det er nok ingen som vil tena pengar det fyrste året i drift, men eg trur det ligg fleire moglegheiter som ikkje vert realiserte i dag.

Mellom anna nemner ho at båten ligg nesten fire timar til kai i Eidfjord, noko som tilseier at det er rom for at han kunne hatt fleire stopp på ruta.

Pressevakt i Skyss, Øyvind Strømmen, stadfestar at det pågår dialog om medfinansiering av eit vidare rutetilbod i Hardanger, men kan ikkje sei noko meir konkret utover det.

Visit Hardangerfjord inviterer onsdag denne veka med seg ei rekkje fagfolk og andre på ein rundtur for å visa kva effekt båtruta kan ha for det lokale næringslivet, skriv Hardanger Folkeblad.