I ei pressemelding måndag etterlyser pressesjef i NAF, Ingunn Handagard, konkrete og forpliktande løfter om meir pengar til vedlikehald av fylkesvegane.

– Partia sine veg-løfter tek ikkje inn over seg kor viktig trygge vegar er for folk over heile landet, uttalar ho.

Ifylgje NAF er det behov for 108 milliardar til vedlikehald av fylkesvegane, og dersom det ikkje skjer noko vil denne summen ha auka til 119 milliardar allereie om fem år.

– Partiprogramma er ikkje tydelege nok på korleis me skal få eit løft for kvardagsvegane, seier Handagard og er tydeleg på at det må løyvast pengar kvart år framover.

Ho viser til at risikoen for alvorlege ulukker er dobbelt så høg på fylkesvegane som på riksvegane.

Eitt parti skil seg ut

Pressesjefen i NAF påpeikar at det også er store behov for skredsikring av vegnettet, noko som vil kosta om lag 62 milliardar kroner på landsbasis.

– Beredskap og klimaendringar gjer at behovet for vedlikehald og utbetring aukar. Vegane har forfalt i mange år og behova som har bygd seg opp er enorme, seier ho.

Ho dreg fram Senterpartiet som det einaste partiet som har konkrete tal på tilskot. I partiprogrammet sitt lovar dei eit særleg løft for lokal- og fylkesvegar, der staten skal bidra med minst 10 milliardar kroner ekstra.

Med unntak av Rødt og MDG, omtalar dei andre partia at dei vil redusera forfallet på fylkesvegane. Arbeiderpartiet, Venstre, SV og KrF skriv i programma sine at dei skal gjera dette gjennom auka tilskot. Høgre vel ein annan modell der fylkeskommunen kan søkja staten om medfinansiering, medan Framstegspartiet vil ha ei heilt ny organisering.

Utbetringar i gang

I Hardanger har det blitt gjort tiltak på fleire fylkesvegstrekningar dei siste åra, mellom anna på Fv. 79 mellom Kvanndal og Ålvik, og ved Steinstø i Kvam.

Og sidan mai i år har det blitt jobba med strekninga mellom Granvin og Folkedal på den same fylkesvegen.

Ifylgje , pågår det lengre arbeid på desse fylkesvegane i Hardanger per i dag:

• Fv. 576 ved Røyrvik i Kvam
• Fv. 49 ved Kvennsvoll i Kvam og i Jondalstunnelen i Ullensvang
• Fv. 79 ved Laupsanes i Kvam, samt mellom Folkedal og Haukanes

I tillegg er det kortvarige arbeid i fleire tunnelar på fylkesvegane både i Kvam, Ullensvang og Ulvik.