Gode nyhende for desentralisert studietilbod i Hardanger
HVK Studiesenter som tilbyr desentralisert studietilbod i Hardanger, Voss og Kvinnherad, er eitt av fire studiesenter i Vestland som får eit årleg tilskot på to millionar kroner dei neste tre åra.
Det opplyser Vestland fylkeskommune.
– At me no kan gje støtte over tre år, gjer at sentera kan jobba meir langsiktig og byggja solide samarbeid med næringsliv og utdanningsinstitusjonar, seier Sigrid Brattabø Handegard, leiar for hovudutval for næring i Vestland fylkeskommune.
Ho seier det overordna målet med det desentraliserte studietilbodet er å gje fleire som står utanfor arbeidslivet tilgang til utdanning og kompetanseutvikling slik at dei får ein sjanse i arbeidslivet.
Hovudutvalet fordelte tilskotet til studiesentera i eit møte 26. august.
– Studiesentera spelar ei nøkkelrolle i å skaffa rett kompetanse i distrikta. Slik legg me til rette for at dei som bur langt frå dei eksisterande utdanningsinstitusjonane skal få betre tilgang til utdanning der dei bur. Det er særleg viktig der tilbodet elles kunne vore for avgrensa, seier Handegard.
Samarbeid mellom næringshagar
På nettsidene til HVK Studiesenter kan ein lesa at utdanningstilbodet er resultat av eit samarbeidsprosjekt mellom Hardanger og Voss Næringshage, Næringshagen i Ullensvang og Kvinnherad Næringsservice som starta i 2021.
HVK står for Hardanger, Voss og Kvinnherad, og studiesenteret dekkjer kommunane Eidfjord, Kvam, Ullensvang og Ulvik, i tillegg til Kvinnherad og Voss.
Barnehagelærar, rekneskapskonsulent og logistikkoordinator er mellom studia som blir tilbode no.
Vil sikra etterspurd kompetanse
Ifylgje fylkeskommunen kjem midlane som no er fordelte frå Kommunal- og distriktsdepartementet, og tildelinga skjer med atterhald om eventuelle endringar i statsbudsjettet.
I tillegg til HVK Studiesenter, får dei tre andre studiesentera i Vestland også to millionar årleg kvar i tre år framover. Desse er:
- StudieHub – Fjordane Studiesenter
- Studiesenteret Kysten
- Sogn Kompetanse