Regjeringa vil premiera lukka anlegg

Ei ny ordning som vart lagt fram av fiskeri- og havministeren i dag gjev opning for å halda fram med produksjon dersom ein tek i bruk lukka oppdrettsanlegg.

– Ordninga skal bidra til utvikling av nye driftsformer med lågare miljøpåverknad enn dagens opne merder, seier Næss i ei pressemelding.

Den nye ordninga fylgjer opp ei høyring om bruk av nedjustert kapasitet på særskilde miljøvilkår.

– Me har gått grundig gjennom høyringssvara, og gjort enkelte justeringar. Mellom anna har me styrka fokuset på å hindra at lakselus kjem inn i produksjonseiningane. Dette er viktig både for å unngå at ordninga bidreg til auka lusetrykk, men også for å verna velferda og helsa til fisken, uttalar fiskeri- og havministeren.

Reguleringssystem

Trafikklyssystemet vart innført i 2017 og tatt i bruk i 2018-2019 og er meint som eit verktøy for å sikra ein forutsigbar og berekraftig vekst i havbruksnæringa.

Systemet sorterer produksjonsområda etter fargane grøn, gul eller raud ut i frå korleis lakselus påverkar villaks i området. Fargen avgjer om oppdrettarane får løyve til å veksa, oppretthalda produksjonskapasitet eller om dei må redusera kapasiteten.

Det er oppdrettarar som har fått vedtak om å redusera produksjonen som med den nye ordninga kan få høve til å auka igjen, under føresetnad om at det skjer med lukka teknologi.

Det vert stilt krav om at dei lukka merdene ein tek i bruk skal ha fylgjande eigenskapar:

• Tett barriere ut mot omgjevnadane
• Ingen inntak av egg og frittsymjande stadier av lakselus
• Slam og fôrrestar skal kunna samlast opp
• Ekstra sikring mot rømming

Meir å gå på

Dagleg leiar i Eide Fjordbruk, Sondre Eide, uttalar til bransjeavisa iLaks at han er glad for meldinga frå regjeringa.