Terje Breivik om livet utanfor politikken: – Vanvittig deilig å vera i fri dressur

– Eg hadde lyst til å vera leiar, fortel Terje Breivik om kvifor han enda opp som direktør for Akvariet i Bergen.

Denne veka er han gjest i podkastserien vår, Hardangerfolk, og her fortel han om gleda ved å få ei gruppe menneske til å fungera saman.

I direktørjobben har han ansvaret for å styra prosessen fram mot realiseringa av verdshavsenteret «O», der ein skal samla både Akvariet, Havforskingsinstituttet og høgare utdanning under same tak, med mål om å byggja eit verdsleiande kompetansemiljø som sikrar berekraftig bruk av havet i framtida.

Det er eit oppdrag han finn svært meiningsfylt:

– Havet er livsviktig for oss menneske. 70 prosent av oksygenet vårt kjem frå havet, og me veit altfor lite om kva menneskeleg aktivitet gjer med havet, seier han.

Terje Breivik, direktør ved Akvariet i Bergen — Terje Breivik trivst godt som vekependlar og seier det aldri har vore aktuelt å flytta frå Ulvik til Bergen.

Sjømann i blodet

Engasjementet for havet og å finna gode løysingar for å ta vare på det, er noko han har arva.

Både farfaren og oldefaren hadde jobbane sine til havs, som fiskar og skippar. Og faren hans fylgde i deira fotspor.

– Pappa var skippar i utanriksfart, og før eg vart så gamal at eg tok sommarjobbar reiste eg med han kvar sommar. Så eg har eit halvt år fartstid til sjøs og var eigentleg fast bestemt på å verta sjømann, fortel han.

Men det var før idretten, og seinare politikken, tok han.

I den ferske podkastepisoden mimrar han tilbake til korleis det var å veksa opp i Ulvik under gullalderen på 70-talet, og avslører kvifor det ikkje er aktuelt for han å gjera bergensar av seg.

Terje Breivik på Akvariet. — Behind the scenes: Her trivst han kanskje aller best, i rommet som skjuler seg bak akvariuma i det største visningsrommet på Akvariet. – Det er på bakrommet alt det spennande skjer!

Hardangerfolk er Hardanger.no sin eigen podkastserie. Du finn episodane der du vanlegvis høyrer podkast.