– Det byrja for nokre år sidan då me fekk ein førespurnad frå eit rederi som lurte på om mannskapet på eit cruiseskip som skulle koma til Eidfjord kunne hjelpa med å rydda ei strand for bos, fortel Marit Stadheim.

Ho er berekraft- og destinasjonsansvarleg i Visit Eidfjord, og fekk med dét den fyrste spiren til ideen om å engasjera cruisemannskap i å gjera noko konkret for lokalsamfunnet.

På grunn av korona låg ideen til modning nokre år, før ho igjen henta han fram då det viste seg at Eidfjord hadde eit cruiseanløp på dagen for aksjonen Rein Hardangerfjord i september i fjor.

– Me henvende oss til rederiet og spurde om dei ville bidra, og det var dei positive til, fortel ho.

Mannskapet blei delt i grupper og frakta med båt til ulike stader som elles ikkje er så lett tilgjengelege. Der fann dei både tauverk, garn og mykje anna som var skylt i land.

I år ville Stadheim gjera det til eit enno større prosjekt, og tok difor kontakt med dei ulike rederia som hadde cruiseanløp i Eidfjord i løpet av sommaren.

Fem cruiseskip melde tilbake at dei ville stilla med mannskap til ryddedugnadar, og i helga går den siste av desse av stabelen når cruiseskipet MS Bolette legg til kai sundag.

Ikkje grønvasking

Marit Stadheim i Visit Eidfjord er glad for at så mange er positive til å gjera ein innsats for å gjera det trivelegare på staden dei legg til kai.

Sjølv om ho forstår at noko av motivasjonen bak kan vera at rederia kan visa det fram i sine eigne kanalar, vil ho ikkje kalla det grønvasking.

– Det er vinn-vinn, men mest av alt er det bra for Eidfjord at det ser fint ut langs vegar, elvar og vatn, både for innbyggjarar og besøkande.

Ho seier det har kome mange positive reaksjonar på initiativet frå folk i lokalmiljøet.

Også ordførar i Eidfjord, Timo Knoch, trur motivasjonen frå rederia som har stilt med mannskap ryddedugnadar i sommar har vore ektefølt.

– Det er klart at sånt betrar omdømet deira. Men på den andre sida opplever eg at dei er opptekne av å bidra positivt til lokalsamfunnet, seier han.

No håpar han fleire cruisedestinasjonar kan la seg inspirera av det dei har fått til i Eidfjord.

– Plast og anna bos finst langs heile kysten, og sjølv om det ikkje er alle stader det er like lett å koma til, vil all innsats monna.

I år vert ryddedugnaden Rein Hardangerfjord arrangert for fjerde år på rad, 18. september. Det er som står bak.