Over heile landet jobbar travle politikarar no med å sikra partiet sitt flest mogleg stortingsplassar.

Valkampen rullar og går, og her lokalt er det også mange som står på for å jakta veljarar som enno ikkje har bestemt seg til å stemma på nettopp deira parti.

Og dei kjenner kanskje på at dei må jobba raskt. Samanlikna med førre stortingsval, var det over 30 prosent fleire som hadde førehandsrøysta dei tre fyrste dagane etter at røystelokala opna i år enn i 2021, ifylgje tal frå Valdirektoratet.

Dei ferskaste tala deira viser at 464 587 nordmenn hadde førehandsrøysta per 21. august i år.

I vårt distrikt fordeler det seg slik:

Annonse

Det varierer litt mellom kommunane når politikarane samlast i dei fyrste felles møtene etter sommarferien.

I Kvam møttest heradsstyret til eit arbeidsmøte om kommunedelplanen for Kvamskogen førre veke. I planen som er under utvikling, blir det mellom anna lagt opp til ei yttergrense for vidare utbygging og eit meir fortetta sentrum i området rundt landhandelen.

I Ulvik er det møte i formannskapet denne veka, der ei av sakene som skal handsamast er detaljregulering av Bruravik næringsområde. Her ynskjer selskapet Bruravik Utvikling AS, eigd av Lingalaks og Eide fjordbruk, å etablera eit oppdrettsanlegg for laks, med tilhøyrande infrastruktur på land.

Planane deira vil krevja lite inngrep på land sidan mykje av arealet på den nedlagde ferjekaien allereie er bygd ut. I sjøen skal det brukast teknologi som samlar opp slam og gjer at utsleppa til fjorden blir avgrensa samanlikna med oppdrett i opne merdar, ifylgje informasjonen i sakspapira. Her kan ein òg lesa at kommunedirektøren sitt framlegg til vedtak er detaljreguleringsplanen vert lagt ut på offentleg ettersyn i seks veker.

Fram til no har det ikkje vore oppdrettsanlegg så langt inne i fjorden av omsyn til lokale stammar av villaks og sjøaure.

I Ullensvang og Eidfjord er det ikkje møter i formannskap eller kommunestyre før i september.

Du får denne e-posten fordi du er påmeld nyhendebrevet til Hardanger.no. Del det gjerne vidare til andre du trur har interesse av å fylgja utviklinga i regionen.

Det er også mogleg å teikna abonnement her dersom du ynskjer å støtta oss litt ekstra no i oppstartsfasen.

Har du tips eller innspel til saker? Då når du oss på tips@hardanger.no

Du kan også ta direkte kontakt med meg på adressa under.

Helsing

Ingvil Aaen Torpe
Redaktør

ingvil@hardanger.no