Fjorden er ein enkel måte å knyta bygdene og attraksjonane våre saman, og er det noko me treng så er det nettopp enkle måtar å koma oss til og frå kvarandre.
Nok ein gong er det uvisse knytt til vidare drift av båtruta som bind saman Kvam, Ullensvang, Ulvik og Eidfjord i sommarsesongen.
Hardangerrådet jobbar med å finna løysingar for ei vidare finansiering av rutetilbodet når fylkeskommunen ikkje lenger blir med på spleiselaget etter neste sesong.
Aller helst ynskjer dagleg leiar, Ann Irene Myrheim, eit heilårig rutetilbod. Det er ho som er sitert i toppen av nyhendebrevet.
Men no er fokuset fyrst og fremst å redda vidare drift av båten som går i sommarsesongen. Les meir i denne saka.
Når eg den siste tida har snakka med hardingar frå ulike kantar av regionen, er det fleire som har peikt på at det er eit større potensial for å nytta sjøvegen mellom ulike bygdesenter.
Historisk sett var jo båten det viktigaste framkomstmiddelet, og fjorden hovudvegen.
Meir trafikk på fjorden kan sjølvsagt òg ha negative konsekvensar, så når ein tenkjer mogleg vekst blir det viktig å involvera breitt og vekta ulike behov opp mot kvarandre.
Likevel trur eg dei fleste kan vera einige om at det er på sin plass med ei fast båtrute i indre Hardanger, både for tilreisande, næringsliv og fastbuande.
Ein ting er uansett sikkert, siste ord i saka er langt ifrå sagt.
Du får denne e-posten fordi du er påmeld nyhendebrevet til Hardanger.no. Del det gjerne vidare til andre du trur har interesse av å fylgja utviklinga i regionen.
Det er også mogleg å teikna abonnement her dersom du ynskjer å støtta oss litt ekstra no i oppstartsfasen.
Har du tips eller innspel til saker? Då når du oss på tips@hardanger.no
Du kan også ta direkte kontakt med meg på adressa under.
Helsing
Ingvil Aaen Torpe
Redaktør
ingvil@hardanger.no