Etter ein lang sommarferie er det tid for å venda tilbake til kvardagen for dei aller fleste denne veka, iallfall viss du har born i skulealder.
Matboksar og skulesekkar må hentast fram igjen, og i mange heimar ventar spente 1. klassingar på å ta fatt på sine 10 år i grunnskulen.
Foreldre over heile Hardanger er opptekne av trygge skulevegar, kollektivtilbod og gode og stabile læringsmiljø.
Tema som kan bli avgjerande når dei skal vera med på å bestemma kven som får tilliten til å styra landet dei neste fire åra.
Frå i dag av er det mogleg å førehandsrøysta til stortingsvalet for alle som alt er sikre på kven dei ynskjer ved makta.
For sjølv om skulebygningar, skulekrinsar og skulevegar er endå viktigare ved eit lokalval, har det noko å seia kva parti som kjem til makta og gjev retninga landet skal styrast i framover.
Arendal i sentrum
Nok ein gong skal det meste som kan krypa og gå av politikarar, næringslivstoppar, kommentatorar og andre flokka seg til sørlandsbyen for å mingla og debattera under Arendalsuka.
Framtidsretta reiseliv, havbruk, villrein og driftssikker rv. 7 er nokre av temaa som blir tatt opp på Vestlandsbåten der truleg mange av dei som representerer næringsliv og interesseorganisasjonar i Hardanger endar opp, saman med lokalpolitikarane som har tatt turen frå regionen.
Sjølv om valkampen allereie har vore i gang ei stund, markerer Arendalsuka starten på den lange og seige innspurten fram mot valdagen 8. september.
For alle oss som ikkje er i Arendal er det mogleg å få med seg det som skjer på Vestlandsbåten her. Eg kan iallfall lova at eg kjem til å kika innom i løpet av dei neste dagane for å prøva å bli litt klokare på tema som er relevante for heile Hardanger.
Helsing
Ingvil Aaen Torpe
Redaktør, Hardanger.no