Elkem omstiller

Børsnoterte Elkem opplyste sist veke at det vil setja i verk omfattande kostnadskutt, som mellom anna inneber at 300 fulltidsstillinger skal bort innan utgangen av 2026.

Prosessen starta umiddelbart og vil primært råka dei delane av Elkem som er direkte berørte av salet av silkondivisjonen til kinesiske Bluestar som vart kjend tidlegare i år, kom det fram i ei børsmelding frå selskapet.

Kutta tilsvarar rundt ti prosent av arbeidsstokken som er att etter salet av silikonverksemda som inkluderte rundt 4000 tilsette. Etter salet har selskapet om lag 3100 tilsette att, og det er mellom desse dei 300 stillingane skal kuttast i løpet av året.

Dagleg leiar i Elkem ASA, Helge Aasen, forklarte at grepet dei no gjer er naudsynt for å styrkja konkurranseevna og den finansielle robustheita.

– Vårt fokus på kostnadsreduksjonar og effektivisering er avgjerande for å sikra framtida til Elkem som eit solid og smidig selskap, i stand til å gripa nye moglegheiter, uttalte han i samband med børsmeldinga.

Selskapet tek sikte på innsparingar i arbeidskapital og investeringar på til saman 1,3 milliardar kroner, i tillegg til å redusera årlege løns- og driftskostnadar med rundt 600 millionar kroner.

Ny konsernstruktur i Elkem skal bestå av tre divisjonar: Elkem Silicon, Elkem Foundry og Elkem Carbon. Bjølvefossen vil høyra til under Elkem Foundry.

– Vanskelege prosessar

Verkssjef Stig Bruntveit har ikkje oversikt over korleis endringane som er sett i gang i moderselskapet eventuelt vil råka lokale arbeidsplassar.