Fersk rapport avdekkjer stort potensial for Hardanger
Om lag 1 av 4 som bur i ein bykommune kan tenkja seg å flytta til distriktet. Det viser ein fersk rapport frå NORCE som gjev klare råd til korleis Hardanger bør gripa moglegheita til å leggja til rette for at fleire kan ta med seg jobben og etablera seg i regionen.
– Oppsummert viser tala frå undersøkinga vår at det ligg eit stort potensial i å leggja meir til rette for at folk kan flytta dit dei sjølve ynskjer å bu og ta jobben med seg.
Det fortel sjefsforskar ved forskingsinstituttet NORCE, Kåre Hansen.
Saman med kollega Leif Jarle Gressgård har han på oppdrag frå Hardangerrådet undersøkt haldningar og erfaringar arbeidstakarar og arbeidsgjevarar har med fjernarbeid, altså å jobba for ein arbeidsgjevar som fysisk er lokalisert på ein heilt annan plass.
Målet var å finna ut korleis Hardanger kan bli meir attraktivt å flytta til for personar som ikkje er avhengige av å møta opp ein bestemt plass for å utføra jobben sin.