– Gjer meg litt bekymra for framtida

– Etter stortingsvedtaket om kutt i drivstoffkostnadane, blei det brått 8 milliardar mindre til andre ting. For kvart vedtak Stortinget gjer, så veit eg at Jens har mindre pengar i sekken når eg skal diskutera med han. Og det gjer meg litt bekymra for framtida, sa Lubna Jaffery då ho vitja Kulturkonferansen 2026 på Voss like før påske.

For sjølv om regjeringa har slått fast i styringsdokumentet sitt at det skal satsast meir på det frie feltet og sørgja for at det er kunst og kultur i heile landet, gjorde Jaffery det klart at det er vanskeleg å gje nokon konkrete lovnadar utan fleirtal i Stortinget.

– Me må i alle fall sørgja for at me har gode støtteordningar. Stipendordningane våre er veldig viktige, og desse har me styrkt i det siste, hevda ho.

– Infrastruktur for demokratiet

Hanna Wozene Kvam frå Norsk Kulturforum (NOKU) var oppteken av å formidla at alle som jobbar med kultur lokalt og regionalt må tenkja annleis enn før i ei tid der kulturbudsjetta er under press.