God aktivitet i bustadmarknaden i Hardanger siste kvartal
Det har blitt selt flest bustader i Kvam, men også i resten av Hardanger har det vore ein jamn straum bustadsal dei siste månadane. Eigedomsmeklaren har tru på ein stabil haust og vinter.
– Det har vore god aktivitet i bustadmarknaden i Hardanger dei siste månadane. Me har sett ein jamn straum av sal både på bustadar og fritidsbustadar, og generelt raskare omsetnad enn tidlegare, seier dagleg leiar i Nordvik Hardanger, Sebastian Gjerde.
Han fortel at leilegheiter har gått unna på berre nokre veker, medan det tek noko lenger tid å få selt fritidsbustadar.
– Men også der ser me gode prisar og stabil etterspurnad, seier han.
Kvam på topp
Det har vore flest sal i Kvam, særleg av einebustadar og leilegheiter. Gjerde forklarar dette med nærleiken til Bergen og arbeidsmarknaden der.