Hardingsmolt satsar på nyutvikla teknologi
Selskapet Hardingsmolt AS frå Kvam er den aller fyrste kjøparen av ei ny, lukka merdløysing. – Ei naturleg oppskalering basert på dei same prinsippa av våre eksisterande merdar, seier dagleg leiar, Frode Sandven.
Hardingsmolt AS er aller fyrste kjøpar av den lukka merdløysinga Heimdall som vart lansert under akvakulturmessa AquaNor tidlegare i haust.
Merda er utvikla av konsernet ScaleAQ som leverer teknologi og løysingar til havbruksnæringa og har meir enn 900 tilsette globalt.
Hardingsmolt som har base i Tørvikbygd i Kvam, har drive eit postmoltsanlegg ved Koløy på Fitjar sidan 2019 med lukka merdar.
– Me har allereie hatt inne ein søknad til behandling om å auka lukka produksjon hjå forvaltningsapparatet sidan august i fjor. Den nye lukka merda skal brukast i lag med dei andre lukka merdane i tråd med den innsende planen, seier Sandven.
– Me ser for oss å kunna ha ein del av vår smoltproduksjon innanfor trygge barrierar heilt frå rogn til slakt i drifta vår, legg han til.
Ynskjer fortgang
Han seier dei no håpar på eit snarleg svar frå Vestland fylkeskommune slik at den ynskte utviklinga med overgang til lukka løysingar ikkje stoppar opp.