– Me treng arbeidskraft og folk.

Slik skildrar ordføraren i Ullensvang no-biletet i kommunen.

I den ferske episoden av Hardangerfolk, siterer Roald Aga Haug tidlegare samfunnsøkonom og professor ved NHH, Victor Norman, når han peikar på eit av dei største hindera for å få til vekst i folketalet. Sett bort frå den generelle demografiske utviklinga med færre fødde barn då.

– Viss du skal «redda» Hardanger, må du korta inn avstanden mellom dei to sentera som finst i Hardanger, nemleg Odda og Norheimsund/Øystese. Viss me får til ein felles bu- og arbeidsmarknad der, vil det vera redninga for Hardanger.

Han peikar på at kommunikasjonen mellom andre regionsenter som Rosendal, Husnes og Voss også er viktig, både for å sikra tilgang på arbeidskraft og utvikling i folketalet.

– Folk er så opptekne av å koma seg til Bergen og Oslo, men det er mykje viktigare at folk kjem seg mellom Norheimsund og Odda, og kanskje Voss og Odda, slik at ein får eit stort nok tyngdepunkt her inne til at du kan byta jobb, og partnar forsåvidt, seier han.

Og akkurat det med å byta partnar er han litt oppteken av:

– Folk byter partnar, og viss du då ikkje har nok partnaremne å velja i flyttar du frå plassen, seier han.

Utviklinga skjer her og no

Roald Aga Haug trekkjer fram at det har skjedd mykje positivt i og rundt Odda dei siste åra, men seier det er krevjande å forvandla den store verdiskapinga til høgare folketal.

Som ordførar har han vore spesielt oppteken av lokalt næringsliv og at folk skal få realisera draumane sine.

– Eg bestemte meg for ein del år sidan at anten det gjeldt 17. mai-talar eller andre ting så seier eg like gjerne ja med ein gong, fortel han i podkasten.

I tillegg til ny tunnel, rassikring og vidare vekst i det lokale næringslivet, har han éin spesiell draum for framtida. Kva det er kan du høyra i den ferske podkastepisoden som du finn her.