– Næringslivet har ei viktig rolle i samfunnsberedskapen
Når større naturhendingar som flaum, storm eller ras inntreffer, vil kommunar som har eit sterkt og variert næringsliv stå betre rusta.
Difor jobbar NHO Vestland med å auka medvitet hjå bedrifter på Vestlandet om kva rolle dei kan spela i det lokale beredskapsarbeidet.
– Vestlandet blir særleg råka av at det kjem inn mykje vatn. Parallelt med at me må kutta utslepp, må me òg vita at me kan handtera det som skjer her på Vestlandet når klimaet endrar seg, sa regiondirektør i NHO Vestland, Helene Frihammer på eit frukostwebinar retta mot lokalt næringsliv denne veka.
Her vart det mellom anna vist til totalberedskapsmeldinga som kom frå regjeringa i januar i år, der statsministeren mellom anna trekte fram bedriftene si rolle i samfunnsberedskapen.