Slik vil dei bruka rapporten om fjernarbeid
Ein fersk forskingsrapport frå Norce skisserer fem tiltak som kan gjera det enklare for fleire å ta med seg jobben og flytta til Hardanger. No startar Hardangerrådet arbeidet med fylgja opp funna i rapporten.
Ingvil Aaen Torpe
Publisert: 21.10.2025 08:45
– Me er heilt i startfasen enno, men det er ingen tvil om at dette er ei moglegheit me må gripa. Det er nødvendig å etablera nokre nye tankesett som utfordrar måten ein tenkjer rundt kva som er mogleg i distrikta, seier Trude Rindaldo.
Saman med dagleg leiar, Ann Irene Myrheim, utgjer ho administrasjonen i Hardangerrådet som har fått midlar frå fylket til å fylgja opp den ferske rapporten frå forskarane som såg på kva som skal til for å etablera Hardanger som ein attraktiv region for fjernarbeid.