– Openbart at me har mykje å samarbeida om
Ordførarane var samde om behovet for å byggja ein sterkare region i indre Vestland då dei møttest på Hardingtinget. Men kor grensene for ein slik region skal gå, kom det ikkje noko klart svar på.
– Kva rolle har Voss herad i Hardangerrådet? Skal det vera eit assosiert medlemskap eller partnarskap? Eller eit strategisk medlemskap på enkelte område? opna Tonje Såkvitne frå Voss herad med då ho var den fyrste som fekk ordet av dei seks ordførarane som var samla på Hardingtinget.
På førehand hadde dei førebudd svar på nokre spørsmål om korleis kommunane kan dra nytte av kvarandre og jobba tettare saman for å stå imot nokre av utfordringane regionen står ovanfor framover.
Såkvitne held fram med å gjera det klart at det ikkje er naturleg for Voss å avskjera nokon, verken nordover eller sørover.
– Det er naturleg med den posisjonen Voss herad har i geografien å sjå føre seg ein region med Hardanger, Voss og Indre Sogn. Det kjem kanskje litt bardust på her i dag, sa Såkvitne.
Ho samanlikna Voss med Ullensvang som òg er ein kommune som må sjå i fleire retningar.
– Ullensvang har eit tett samarbeid i Hardanger, men er samstundes ein del av Helse Fonna, illustrerte ho.
Ho meinte kommunane ikkje har råd til å la vera å samarbeida framover for å sikra at tenestene dei er pålagde å levera innbyggjarane skal vera gode nok.
Ho fekk støtte av dei andre ordførarane.
Ullensvang-ordførar Roald Aga Haug stadfesta at han gjerne såg lenger enn Hardanger med tanke på interkommunale samarbeid og trekte fram at kommunane i indre Vestland er ganske like både når det gjeld infrastruktur, næring og kraftressursar.
– Eg trur både Ryfylke, Hardanger, Voss og Sogn sit med det same problemet, at når det blir snakka om Vestlandet så er det i praksis kysten det handlar om. Me blir litt gløymde her inne, sa han.
Samstundes var Aga Haug oppteken av at ein ikkje må samarbeida berre for å samarbeida.
